1Cor 15 | ATA | STEP | Ioxe, ta vivilo, eni emasaxa sou alivunoxu xavutalamengi sou a'alo laixe noxou Iesu Kalisito ane eni ea'aloxu noxinge mo ngingi ngeno'u mo sou ngingi ngatulu pekia'inge no anu ne.

1 Ioxe, ta vivilo, eni emasaxa sou alivunoxu xavutalamengi sou a'alo laixe noxou Iesu Kalisito ane eni ea'aloxu noxinge mo ngingi ngeno'u mo sou ngingi ngatulu pekia'inge no anu ne. 2 No anu a'alo ane nesi ane Lataua mupamaulingengi no anu ne lexe ngingi ngateteli pekia'u no anu vaikala ane eni ea'aloxu noxinge ne xo lexe uasi la ngingi ne ngamuxamuxaxu tangengi vitanisi. 3 ^aXo mii ma'ia ane eni eno'u ne ane eni akalanu une'e noxinge, aloxo anu mii tatila manina lexe Kalisito musoli sou susu noxinge aloxo vaikalasou muai no anu Lavuku Tavuna teinu ne, 4 ^bla sou mi'asixu xe mumauli mutulu la no anu voxo tatalusou loxo vaikalasou muai no anu Lavuku Tavuna teinu. 5 ^cMo anu mupala'a noxou Pita xe mukalu la noxi'a ta molomolo noxou mavulovexa mo mulu'e no lia tamei. 6 Xe ili'i no anu la anu mupala'a alaxu vilesisi noxi'a ta vimovimou mose'i noxou sosovosi'a loxo itemaxu itemaxu vile mo itemaxu ta'uve (500). Piena mose'i noxi'a ne uao imaumaulisio, ia mose'i a misoisoli mukalu ne. 7 ^dMukalu la anu mupala'a noxou Iakavo xe mukalu la mupala'a noxi'a ta aposeli ne mukalusi, 8 ^emo kaluxusou la anu mupala'a noxilo kalumo. Eni ne aloxo itema ane nenu mivo'o lalaanu. 9 ^fLa sou eni ne akitu'a noxi'a ta aposeli ne mo lexe eni laixe sou ilemelo lexe aposeli uasi. Xo eni e'oxo masuane'i ta mitema sou lalotu noxou Lataua. 10 ^gIa no anu alauna noxou Latauasi la sou eni exali amitema iou aloxo 'o. Mo alauna noxou ane mune'e noxilo ne loxo mii vitanisi uasi. Eni exaxai pekia'ilo mo euaulixa'a ta aposeli mukalusi ne. Io loxo eni uasi, ia alauna noxou Latauasi ane muxolu noxilo sou e'oxonu xaixai ne. 11 Mo lexe eni a'alomengi xe ta menexilo ia'alomengi, la nexi noxi'a taa'aloxu vaikala iouvilesisi la sou ngingi ngamulaxu tangengi no anu.

Ta Mitema Ane'i Ane Misoisoli ne Imauli La

12 Ia lexe nexi tea'alo lexe Kalisito mutulu mumauli la no anu soli, la sou loxovaa mose'i noxinge ne itali'i lexe ta mitema imomomo sou itulu la no 'a soli uasi? 13 Mo lexe mauli la noxi'a ta mitema ane misoisoli ne uasi la Kalisito ne anu mutulu mumauli la uasi kalumo. 14 Ia lexe Kalisito ne utulu umauli la uasi la a'alo noxixe mo loopala noxinge ne anu mii vitanisi. 15 La sou aloxo ne la nexi loxo ta mitema sou a'alo kalakalavoi no anu mii ane Lataua mu'oxonu, xo nexi tea'aloxu Lataua lexe anu mutulusou Kalisito mumauli la no anu soli. Ia manina lexe anu utulusou Kalisito umauli la uasi aloxo ne la sou lexe ane'i ane misoisoli ne itulu imauli la uasi. 16 Xo lexe ane'i ane misoisoli ne itulu imauli la uasi la sou lexe Kalisito ne anu utulu umauli la uasi avile. 17 Mo lexe Kalisito ne utulu umauli la uasi, la loopala noxinge ne anu mii vitanisi. Mo susu noxinge ne anu a uao uxolusinge ne sio. 18 La sou ane'i ane mimuxaxu tane'i kalumo noxou Kalisito ka misoisoli ne ane'i misuasua mukalu. 19 Mo sou lexe loopala noxinge noxou Kalisito ne sou mauli no anu lialia 'osi la loopalasinge ne uaulixu masuanenge avile mo ta mitema ukalusi no anu lialia 'o.

20 Ia manina Kalisito ne mutulu mo mumauli la no anu soli. Anu aloxo Anu mutulu tei ne sou ane'i ane misoisoli la imauli la. 21 ^hXo loxo soli mune'e noxou itema vile la mauli la noxi'a ane'i ane misoisoli ne une'e noxou itema vile kalumo. 22 Xo anu aloxo 'o noxou Adamu la ta mitema ukalusi isoli. Xe noxou Kalisito la ta mitema ukalusi ne ino'u mauli. 23 ⁱIa vilevilesi ne na'a voxo mo, xe Kalisito, Anu loxo itema ane mutulu tei xe no mine Anu ulivu une'e, la ane'i ane ta noxou ne itulu imauli. 24 Voxo kaluxusou uxali la Anu uitalonu saxisaxila'u ulai noxou Momu Lataua. No mine anu Kalisito umamulonu mo ukalusi'a ta kisikisi'a ta uleenu masumasua e pekipekia'a mo xavine'i mulolutu. 25 ^jXo anu uulaxunu sou saxisaxila'u ulai utalo no mine Kalisito utaolune'i ta uluau ukalusi ne no lia no laaxu xavi noxou. 26 ^kUluau ukalusou sou umamulonu mo ukalusou ane soli ne. 27 ^lXo “Lataua mu'italonu mimii mukalusi ne no lia no laaxu xavi noxou Kalisito.”

Io vaikala lexe mimii mukalusi ne mu'italonu no laaxu ne anu mulamanasi lexe Lataua e mu'italonu mimii mukalusi no tava'u Kalisito ne. Ia Lataua anu molusi uxolu no laaxu uasi. 28 Ia no mine anu u'oxonu mimii aloxo ne ukalu la sou 'Olu molu mumulinu Lataua e mu'italonu mimii mukalusi no laaxu ne, mo sou Lataua umomomo sou uxolu no anu mimii ukalusi.

29 Ioxe lexe mauli la uasi la sou mii ma'ia ane ane'i e mi'ulosi'a sou isu'uline'i ta mitema e misoisoli ne i'oxonu? Lexe ane'i e misoisoli ne umomomo sou itulu imauli la uasi avile la sou loxovaa no anu 'ulo'ulo ane mi'ulosi'a ta mitema sou isu'uline'i ne? 30 ^mXe loxovaa noxixe, la sou nexi ta'italongengi no anu tu'utu'umaxu utotomu 'o? 31 Eni atavulenu soli no voxo utotomu evikala manina aloxo ne xo ta vivilo loxo eni e'osasinge sou ngexolu no nano noxou Iesu Kalisito anu tila noxinge. 32 ⁿLexe eni e'otoxa'a ta mimii ta vova ne Epeso sou mii masaxa noxilosi la mii ma'ia ane eni eno'u? Lexe ane'i ane misoisoli ne itulu imauli la uasi, la, “Nenge ta'ani mo taie xo ne'iela la nenge tasoisoli.” 33 Mamu sou ngamulinu kalakalavoi noxi'a ta mitema. “Xo ta mitema ta masumasua ne ivila'isou 'ilixo laixe ne.”

34 La sou ngatulu no anu lavulavu ane muxolu noxou itema vile lailaixe lexe ngingi ngamulinu, io ngataluxu no anu 'ilixo sou nga'oxonu susu. Mo se'i noxinge ne ilavusou Lataua uasi ne eni avikala aloxo ne sou apamaelangengi.

Vasimenge Ane Umauli La

35 Ia male itema vile utali'i lexe, “Ta mitema ane misoisoli ne ulai la itulu imauli la a loxovaa 'o? Vasime'a ne uxali iou a loxovaa?”

36 ^oXovulaulau! Mii ma'ia ane nini natounu ne anu usoli tei 'o la sou anu upau sou uleme. 37 La sou no mine nini natounu la loxo natounu ovu lololi e uxali ili'i ne uasi, ia ngiaxu vitanisi. Male uiti ngiaxu, uasi, la mii vilemo ngiaxu. 38 Ia Lataua ulosi'a vasime'a loxo anu molu mumasaxau. Mo ngiaxu iouiou vilevilesi ne anu ulosi'a ainu vilevilesi mo. 39 Xe mimii no lia 'o ne anu iouvilesisi uasi. Nenge vasimenge mo xe ta mimii ane imuamua'i no 'a lialia ne vasime'a mo xe ta ngiala ne vasime'a mo ia ta sinana ne vasime'a iouvilemo. 40 Anu aloxo ne la sou mimii sou loxotolo ne na'u vasimolu mo xe mimii sou lialia ne na'u vasimolu mo. Ia mimii sou loxotolo e lailaixe ne anu vasimolu iouvilesisi mo mimii lailaixe sou lialia 'o ne vasimolu iouvilemo. 41 Mo aso ne anu na'u kaaxu lailaixe mo xe so'io ne anu na'u kaaxu lailaixe mo. Ia ta oto ne na'a kaaxa'a mo. Io ta oto kaaxa'a ne uxali iouiou mo lailaixe manina.

42 Anu iou aloxo nesi no anu mauli la noxi'a ane'i ane misoisoli. Vasimolu ane mi'asixu ne anu umasua ia vasimolu ane utulu umauli la ne anu umomomo sou uui la uasi. 43 ^pNo mine mi'asixu la vasimolu ne laixe uasi ia mutulu mumauli la no anu mimii lailaixe. Mi'asixu la mamalaxusi ia mutulu mumauli la no anu xavi tatila. 44 Vasimolu e miasixu ne anu sou lialia 'o si ia anu mumauli la, la vasimolu ne sou uleenu. La sou vasimolu sou lialia 'o xe vasimolu sou uleenu kalumo ne. 45 ^qLa sou kaukavusou muai lexe, “Adamu anu tei ne muxali loxo itema mumaulisi,” ia Adamu ane ili'i ne muxali loxo Uleenu sou ulosi'a ta mitema mauli. 46 Xo uleenu ne ulu'e tei uasi. Vasimolu mulu'e tei ka sou uleenu. 47 La sou itema ane tei ne anu molu no anu lomulo sou lialia 'o, xe itema ane tameisou ne anu molu no opo loxotolo. 48 Anu aloxo ta mitema sou lialia 'o ne ane'i loxo itema sou lialia. Xe aloxo ta mitema sou opo loxotolo ne la sou ane'i loxo itema sou opo loxotolo. 49 Mo anu iouvilesisi aloxo nenge texali loxo ta mitema ane sou lialia 'o ia ili'i la nenge taxali loxo itema ane sou opo loxotolo.

50 Ioxe eni avikalangengi, ta vivilo lexe mii ane vasimenge lialia 'o ne umomomo sou uxolu kalumo no nano no 'a saxisaxila'u noxou Lataua uasi. Mo mii ane ukalu ne umomomo sou upita ilou mii ane lailaixe mo kaluxu uasi, uasi. 51 ^rNgalomu, eni avikala ngengixu vaikala utalume vile aloxo 'o. Nenge mose'i ne tasoli uasi, ia nenge ukalusi ne taxiu vasimenge, 52 no mine ane ne uxali loxo ienge u'amo no anu xoolau utama kaluxusou. Xo no mine xoolau utama la ane'i ane misoisoli ne itulu imauli la, ia isoli la uasi, mo nenge ne vasimenge uxiu ukalusi. 53 ^sLa sou vasimolu ane umamulo ne utokolomo no anu mimii lailaixe ane umamulo uasi. Mo vasimolu ane musoli ne utokolomo no anu mimii ane sou umauli mo kaluxu uasi. 54 ^tNo mine vasimolu ane umamulo ne utokolomoxu no anu mimii lailaixe ane umamulo uasi. Xe vasimolu ane sou soli ne utokolomoxu no anu mimii ane sou umauli mo kaluxu uasi. Lexe mimii ane ne uxali la vaikala e mikaukuvunu ne uxali maninasou aloxo ne. “Soli ne mumamulo avile mo Lataua muuaulixu.”

55 ^u “Soli, xavineni ava? Soli, tavimeni ava?”

56 ^vXe tavi sou soli ne anu a 'ilixo masumasua mo xavi sou 'ilixo masua ne anu ane lapuloto. 57 Ia talemolu laixe ulai noxou Lataua! Anu mulosinge xavi sou tauauli no anu mune'e noxou Tila noxinge Iesu Kalisito. 58 Anu aloxo ne la sou ta vivilo e emasaxainge manina, ngatulu pekia'inge io ngasasalo no anu mii vile uasi. Utotomu ne ngalosinge ukalusi ulai no anu xaixai noxou Tila. Xo ngingi ngelavu lexe xaixai noxinge no nano noxou Tila ne anu vitanisi uasi.